KANMAH KONG

FIDI BIAZAI

FIDI cu zeidah a si?

FIDI timi hi sullam dang(actor, star tbk.) a ngeitermi zong kan um cio ko lai. FIDI kan i ti hnawhchan hi tlawmpal in FIDI BIAZAI nih a hmuhning langhter kan van duh ve. FIDI ti cu van i ceumi ARFI khi kan sawh duhmi a si. FIDI tiin muicawl a tlakmi tlangval (Actress/Minta) khi kan ti duhmi a si lo. FIDI/ CEUCIN/ ARFI ti cu Ram le miphun caah zohthla mi MINO tiin hlanlio kan pupa hna nih an rak i chuankhan tawnmi kan biafang a si.

Zeiruangah FIDI kan hman??

Arfi cu a mah tein ceunak a ngeive mi nika fatete (Glaxy) pawl an si. Chun caan ah Nika ceunak nih phum/phen in a ceu lang kho rih hlah hmanhseh, Nika pi tla in Khuamui hmanhseh, i dinlo tein a muidupmi zan kha ceu dildel tein a thuam. Vawleipi caah ceunak le hnangamnak a petu FIDI ceupi a si. Vawlei cung ceunak caah RIAN lianpi i ngeih in rian a tuan.

Cu ve bantuk in FIDI bantukin kan ram kan vawlei caah a ceu ding cu MINO kan si. Ram le miphun nih suktung bantuk in bochan ding lawngte kan si hna. Cucaah FIDI he tachunh LAI MINO nih Kan ram le kan miphun, Kan nunphung le kan zatlang, Kan ca le kan holh thanchonak le kilvennak caah kamlo chuncha bang a dirdingmi le Ram le mipi nih suktung bantuk bochan ding lawngte minung i ti duhnak kha a si. Nihin na ruahnak na tialmi biafang le na phan, na hluaimi BIAZAI nih hmailei ram le miphun thanchonak caah, Na caholh kilvennak caah, vawleipi a damnak caah thape tu lawngte kan si dih hna. Lam hmuhsaktu Arfi ceu dawh kan si hnga. Kan Bible caching kan zoh ahcun Mathew 2;1-2, 7-10, Numbers 24:17 hmuh khawh kan si. Biakam hlun nihcun Jacob chung in Arfi pakhat a chuak lai i tiin a langhter. Mathew nih cun Arfi hmailei kongkau thil a hmuhfianning le Mifim hna lamkaltu a sinak zongkha kan hmu khawh lai. Hi hi cu biaknak lei mit in Pastor lei le biaknak cawn hman nih kan fiang hna seh law a tling deuh hnga ti zong kan ruah.

Cucaah Ram le miphun caah hmanthlak MINO can ah FIDI timi min lakin kan hmannak a si. FIDI BIAZAI ti cu Mino kan biazai tinak a si ko. Nihin Mino nih kan ngeihmi awzai hman in biazai kan phuan kan tialmi hi hmailei Lai miphun hmunkhat a kan fontu le kan caholh thanchonak lei a si ah, Laimi, Lairam tlaichannak le humhim duhnak a si ah thazang ruahnak a kan pekchin lai i FIDI ceu dawh bang RAM LE MIPHUN caah kan i hmang chin lai timi ruahchannak nganpi he FIDI BIAZAI ti kan van tarlanghnak a si.

Upatnak nganpi he,

FIDI BIAZAI

LAI/CHIN YOUTH INTERNATIONAL ONLINE FELLOWSHIP

fidibiazai@gmail.com